Localizado en Verín o castelo medieval de Cabreira

Forma parte da rede de fortalezas do val de Monterrei

O achado está na zona coñecida como o Pozo do Demo, desde o que se divisa todo o val de Monterrei
O achado está na zona coñecida como o Pozo do Demo, desde o que se divisa todo o val de Monterrei

Na zona do Pozo do Demo, emprazado nunha “impoñente paisaxe de rochedos descarnados de granito” e “controlando a vista de todo o val de Monterrei case ata o val de Laza” foi localizado o castelo medieval de Cabreira, en Verín. O achado presentouse este martes por membros da Universidade de Vigo e do Concello de Verín, anunciándose a realización o vindeiro ano dunha intervención arqueolóxica neste enclave, que formaría parte da rede de fortalezas do val de Monterrei.

Na súa presentación participaron Susana Reboreda, decana da Facultade de Historia do campus de Ourense; Gerardo Seoane, alcalde de Verín; Beatriz Comendador, coordinadora e investigadora do Grupo de Estudos de Arqueoloxía, Antigüidade e Territorio da Universidade de Vigo; Víctor Rodríguez, arqueólogo e membro da Área de Historia Medieval da Universidade de Vigo; Nieves Amado, arqueóloga; Andrés Diz, estudante do Grao en Xeografía e Historia, e Diego Lourenzo, tenente alcalde de Verín.

Ler a noticia completa no DUVI